قصيدة وصف الجمس2 (ناصر الفراعنة)

راكب اللي لا كورلا ولا هوندا * مركب السادات واصحاب الزعامة
صنعة امريكا على زورٍ وغندا * من نظام الدولة العظمى نظامه
من مانيلا ال ما وراء نيوزلندا * عجزت اهل الشرق تكشف سر خامه
لاعطا القاعة وصار القاع سندا * ما تقول الا ابو زيدٍ سلامه
والتواير لاشلعها واجرهندا * جرته عن جمةٍ تسعين قامة
نقشة اجنوطه مثل كف الخوندا * باقيٍ فوقه من الحنا علامه
وزول مجمولٍ تهايق مع برندا * زول بديه لاعطا خشم العدامه
فيه من نجوى ومن ذكرى ورندا * مقدمه كنه حشا فاتن حمامه
شفة اوريعٍ شرب قوطي مرندا * لون كبوته عقب طول الجهامه
وراس شيخٍ جبهته من الخوف تندا * بديه ليا خالطه وبل الغمامه
والمراتب ثوب افنديٍّ تفندا * او هنوفٍ لبسوها احلا بجامة
وتندةٍ بيضاء مثل در الوغندا * او خدود الآنسه نهلة سلامة
ولمبتينٍ لاظلم الليل وتحندا * فيهن من عيون زرقاء اليمامه
والمكينة حسها طبلة عبندا * في زفاف الست صاحبة الفخامة
لامشا ظبيٍ والى وقّف حوندا * ولقبل اعقابٍ والى قفى نعامه
سايقه ماهوب من هتل الحمندا * حي ابو مجناه لاطش العمامه
خاطره من عجة الكنت اجلعندا * لين شاف بفيضة الرقعي سحامه
يوم صاح وزند الرشاش زندا * ما تنسم لين وقّف فالثمامه
عد طبلونه وزاد النار قندا * وجآت عنه اخبار والمركز امامه
فر جمسه واحتسى الرشاش عندا * في ضحايوم ٍ مثل يوم القيامه
قال والله مايصير الصلب فندا * دام لي شفٍّ ولي كفٍّّ وهامه
فالضحى منصاه دار اخوان سندا * والعشا منصاه دار اخوان شامه
ياولد دوك اشقرٍ من دون صندا * جادلٍ كن رنة الفضة كلامه
جادلٍ كن فمحجره اسيوف هندا * محجره كونه ولاكون الرغامة
كنّ باعلى لبته عشبة علندا * وكن من بين الثغر قرفة بشامة
والنهد كن لون راسه قدح زندا * او كما جمرة ملوكٍ في مهامه
جادلٍ عني مثل ربع الجلندا * لاني من اخواله ولا من عمامه
جادلٍ له ندبل البند الف بندا * منجضٍ وسمه علي شامه وشامه
والله اني من فراقه نبت فندا * غاديٍ صدري مثل عش الحمامه
كن من بين الضلوع اصفوف جندا * فيلقٍ من هم اخذ قلبي تمامه
قالوا العالم كم ادواً كان من داء * مثل وصله خطر بس انه سلامه
__________________